172 flugferðum aflýst á Heathrow

172 flugferðum hefur verið aflýst á mánudag og þriðjudag um Heathrow-flugvöllinn í London vegna kjaraviðræðna starfsmanna flugvallarins. Samningaviðræður hófust á nýjan leik í dag og allt verður lagt í sölurnar til að koma í veg fyrir allsherjarverkfall.

Starfsmenn flugvallarins, í verkalýðsfélaginu Unite, hyggjast leggja niður störf í 48 klukkustundir á mánudag og þriðjudag eftir að hafa hafnað nýjasta samningstilboði frá rekstrarfélagi flugvallarins.

Verkalýðsforingjar hittu stjórnendur flugvallarins í gær og funduðu með þeim langt fram eftir kvöldi. 

„Við höfum sett af stað aðgerðaráætlun til að halda flugvellinum opnum og öruggum í þessa tvo daga,“ sagði talsmaður Heathrow í samtali við The Guardian.

„Við reiknum með því að öryggisleit muni ganga hægar en venjulega og biðjum farþega um að vera vel undirbúnir þegar þeir mæta hingað,“ bætti hann við.

• Blogga um frétt