Trump frestar tollum vegna jólaverslunar

Donald Trump Bandaríkjaforseti sagði álagningu innflutningstollanna frestað vegna jólaverslunar.
Donald Trump Bandaríkjaforseti sagði álagningu innflutningstollanna frestað vegna jólaverslunar. AFP

Donald Trump Bandaríkjaforseti tilkynnti í gær að bandarísk stjórnvöld hafi ákveðið að fresta álagningu 10% innflutningstolla sem taka áttu gildi 1. september. Vonast stjórnvöld með þessu til að draga úr áhrifum tollanna, sem leggjast munu á farsíma, fartölvur og ýmsan annan neytendavarning, á jólaverslun í Bandaríkjunum.

„Við erum að gera þetta fyrir jólavertíðina, svona til öryggis ef einhverjir innflutningstollanna hefðu áhrif á bandaríska viðskiptavini,“ hefur Reuters eftir Trump. „Til öryggis, svona ef þeir hefðu áhrif á fólk, höfum við seinkað þeim svo þetta hafi ekki áhrif á jólaverslunina.“

Innflutningstollarnir gilda fyrir innflutning á kínverskum vörum að andvirði um 300 milljarða Bandaríkjadala. Segir Reuters frestunina nú og aukinn kraft í viðskiptaviðræðum kínverskra og bandarískra ráðamanna hafa ýtt við verðbréfamörkuðum í Bandaríkjunum og hækkuðu vísitölur nokkuð við fréttirnar. Þannig hækkaði t.a.m. Standard & Poor's 500 um 1,5% og Nasdaq um tæp 2%.

Tollarnir eiga nú að taka gildi 15. desember og munu gilda um þúsundir muna, m.a. fatnað og skó, auk áðurnefndra farsíma og fartölva.

Ekki hefur innflutningstollum á allan varning þó verið frestað því bandarísk stjórnvöld hyggjast enn skella 10% tolli á kínverska flatskjái, kínversk matvæli, fatnað og ýmsan kínverskan rafrænan varning eins og snjallhátalara Amazon, Google og Apple og snjallúr Apple og Fitbit frá og með næstu mánaðamótum.

mbl.is
Fleira áhugavert
Fleira áhugavert