Donald Trump Bandaríkjaforseti segist munu halda blaðamannafund á morgun, þriðjudag, til að fara yfir þær ráðstafanir sem ríkisstjórn hans hyggst gera vegna útbreiðslu kórónuveirunnar.
Forsetinn flaug aftur til Washington síðdegis eftir að hafa varið helginni á golfvelli sínum í Flórída. Hann hefur síðustu vikur gert lítið úr þeirri ógn sem vísindamenn hafa sagt stafa af veirunni en eftir neyðarfund með starfsliði sínu sagði hann blaðamönnum í dag að hann hygðist kynna þingmönnum veigamiklar efnahagslegar ráðstafanir á morgun. Nefndi hann meðal annars að létt yrði á skattbyrði og aðstoð veitt því verkafólki sem óttaðist það að missa úr vinnu vegna veikinda.
Trump sagði veiruna hafa komið heiminum að óvörum.
Yfir forsetanum vofðu einnig í dag áhyggjur af heilsu hans, eftir að tveir þingmenn úr röðum repúblikana sem nýlega áttu fund með honum tilkynntu að þeir væru á leið í sjálfskipaða sóttkví, af ótta við að hafa sjálfir smitast á ráðstefnu íhaldsmanna í nágrenni Washington-borgar.
Annar þeirra, þingmaðurinn Matt Gaetz, deildi forsetaflugvélinni með Trump fyrr í dag.
Útbreiðsla veirunnar hefur sömuleiðis vakið spurningar um hvort Trump geti haldið áfram þeim fjöldasamkomum sem eru stór hluti af baráttu hans fyrir að fá að sitja annað kjörtímabil í Hvíta húsinu.
Spurður hvort búið væri að athuga hvort forsetinn hefði smitast af kórónuveirunni sagðist varaforsetinn Mike Pence ekki vita það.