Boris Johnson, forsætisráðherra Bretlands, hóf sinn fjórða dag á sjúkrahúsi vegna Covid-19-sjúkdómsins í morgun og er ástand hans stöðugt. „Hann er stöðugur, fer batnandi, settist upp og átti í samskiptum við heilbrigðisstarfsfólk í dag,“ sagði menningarráðherrann Oliver Dowden við fréttastofu BBC. „Ég held að þetta sé að koma hjá honum.“
Johnson er þekktasti stjórnmálaleiðtogi í heiminum sem hefur sýkst af kórónuveirunni og segir fréttastofa AFP að ferð hans á gjörgæsludeild á mánudag sé fordæmalaus á síðari tímum fyrir forsætisráðherra sem glímir við neyðarástand heillar þjóðar.
Eins og áður hefur komið fram fyllir utanríkisráðherrann Dominic Raab skarð Johnsons meðan forsætisráðherrann er á sjúkrahúsi en talið er að framlenging á útgöngubanninu sem er í gildi á Bretlandi vofi nú yfir. Raab og ríkisstjórnin hafa þó gefið út að engar tilkynningar varðandi það verði gefnar fyrr en hið upprunalega útgöngubann hefur runnið sitt skeið.