„Markmiðið er að lögleiða heimilisofbeldi“

Pólsk stjórnvöld ætla sér að draga sig úr Istanbúl-sáttmálanum svokallaða um forvarnir og baráttu gegn ofbeldi á konum og gegn heimilisofbeldi. Zbigniew Ziobro, dómsmálaráðherra Póllands, greindi frá þessu í dag.

Ástæðan sem Ziobro gaf var að sáttmálinn væri „skaðlegur“ þar sem að hann leggur þær skyldur á skóla að kenna krökkum um kyngervi. Hann bætti því við að umbætur stjórnvalda síðustu ár veittu konum nægilega vernd. BBC greinir frá.

Þúsundir pólskra kvenna hafa mótmælt ákvörðuninni í mörgum borgum í Póllandi. „Markmiðið er að lögleiða heimilisofbeldi,“ sagði Magdalena Lempart, skipuleggjandi mótmælagöngunnar í Varsjá, í samtali við Reuters.

Ziobro sagði að ríkisstjórnin myndi formlega hefja það ferli að draga sig úr sáttmálanum, sem var fullgildur í Póllandi árið 2015, á mánudaginn. „Sáttmálinn inniheldur atriði af hugmyndafræðilegum toga, sem við teljum að séu skaðleg,“ sagði hann.

Forystuflokkurinn í Póllandi Lög og réttur (Pis) og samstarfsflokkar deila gildum með kaþólsku kirkjunni og stjórnvöld hafa lofað að gera hefðbundnum fjölskyldugildum hátt undir höfði.

Zbigniew Ziobro er dómsmálaráðherra Póllands. AFP

• Blogga um frétt