Forsætisráðherra Indlands, Narendra Modi, hefur heitið því við Sameinuðu þjóðirnar að framleiðslugeta Indverja hvað bóluefni varðar muni nýtast allri heimsbyggðinni í baráttunni gegn kórónuveirunni. Modi sagði í ræðu sinni á allsherjarþingi Sameinuðu þjóðanna að Indland væri það land sem framleiddi mest magn bóluefna.
„Ég vil veita alþjóðasamfélaginu meiri fullvissu [um bóluefni],“ sagði Modi.
„Bóluefnaframleiðsla og afhendingargeta Indlands verður notuð til að hjálpa öllu mannkyni í barátunni við veiruna.“
Modi lofaði þessu á sama tíma og Indland á í erfiðleikum með að koma böndum á útbreiðslu veirunnar. Þegar hafa tæpar 6 milljónir Indverja smitast og fleiri en 93.000 fallið frá vegna COVID-19.
Að sögn Modi eru indversk lyfjafyrirtæki nú á þriðja stigi klínískra rannsókna á bóluefnum. Indverjar munu hjálpa öllum sem á því þurfa að halda að geyma og framleiða bóluefni, að sögn Modis.