Bakgrunnur þjóðvarðliða rannsakaður

Þjóðvarðliðar fyrir utan þinghúsið í Washington í gær.
Þjóðvarðliðar fyrir utan þinghúsið í Washington í gær. AFP

Bakgrunnur allra þjóðvarðliða verður rannsakaður fyrir embættistöku Joes Bidens á miðvikudaginn til að ganga úr skugga um að öryggis verðandi Bandaríkjaforseta verði gætt.

Hershöfðinginn Daniel Hokanson greindi frá þessu í samtali við CBS News í gær þegar hann var spurður hvort hermenn yrðu rannsakaðir áður en þeir kæmu til Washington.

Eftir óeirðirnar í bandaríska þinghúsinu sjötta janúar, þegar stuðningsmenn Donalds Trumps, fráfarandi Bandaríkjaforseta, ruddust þangað inn, hefur komið fram að einhverjir þeirra sem tóku þátt í þeim tengist eða hafi tengst hernum.

AFP

„Leyniþjónustan og FBI [bandaríska alríkislögreglan] munu starfa saman við að rannsaka allan mannskapinn sem er að koma,“ sagði Hokanson.

Mikil öryggisgæsla er í Washington fyrir athöfnina. Stór hluti miðborgarinnar hefur verið lokaður af og öryggisgirðingar verið settar upp. Um 25 þúsund þjóðvarðliðar verða sendir til höfuðborgarinnar.

mbl.is

Bloggað um fréttina

Fleira áhugavert
Fleira áhugavert