Fellibylur bætist ofan á metflóð í Kína

Ferju- og lestarferðum í Kína var víðast hvar aflýst í dag vegna fellibylsins In-Fa, sem nú nálgast austurströnd landsins, nærri stórborginni Sjanghæ. Það verður aðeins til þess að bæta gráu ofan á svart þar sem milljónir Kínverja berjast nú við mikil flóð. Tugir hafa þegar látist og hundruð þúsunda hafa þurft að yfirgefa heimili sín.

Frétt af mbl.is

25 látnir í Zhengzou

Kínversk yfirvöld hafa gefið út þriðja stigs viðvörun vegna væntanlegs fellibyls, á kvarða þar sem sjötta stigs viðvörun er alvarlegust. Um 100 lestir hafa verið kyrrsettar á austurströnd landsins og því mörg þúsund manns sem verða strandaglópar.

Borgaryfirvöld í Sjanghæ hafa þá lokað almenningsgörðum og söfnum í borginni og biðla til íbúa að koma ekki saman í stórum hópum í dag utandyra og helst vera innandyra almennt.

Frétt af mbl.is

Kona sem bjargaði barni sínu fannst látin

Þar að auki hefur öllum stærri skipum verið lagt við Yangshan-höfn í Sjanghæ, það gera um 150 skip og hefur nokkrum þeirra, aðallega gámaflutningaskipum, verið gert að flýja óveðrið til annarra hafna.

Eins og fyrr segir hafa Kínverjar þurft að þola metflóð á undanförnum dögum, sérstaklega í Henan-héraði þar sem minnst 58 hafa látist og um 500 þúsund manns yfirgefið heimili sín. Þar eru stjórnvöld loks að koma skikki á svæðið, hreinsa götur og koma grunninnviðum aftur í lag.

• Blogga um frétt