Tólf handteknir vegna dauða átta ára stúlku

Bænirnar báru ekki árangur.
Bænirnar báru ekki árangur. Ljósmynd/Colourbox

Tólf manns úr trúarhópi hafa verið handteknir vegna dauða átta ára stúlku í Ástralíu.

Elizabeth Struhs, sem var sykursjúk, lést 7. janúar á heimili í borginni Brisbane eftir að hafa að sögn verið meinað um insúlín í næstum eina viku.

Fyrr á þessu ári voru foreldrar hennar sakaðir um morð, pyndingar og fyrir að að hafa ekki útvegað lífsnauðsynlegan búnað, að sögn BBC.

Lögreglan segist núna ætla að leggja fram kærur á hendur 12 manns til viðbótar á aldrinum 19 til 64 ára vegna dauða stúlkunnar.

Trúarhópurinn vissi af versnandi heilsufari Struhs en leitaði ekki hjálpar, að sögn lögreglunnar í Queensland.

Foreldrar hennar, Jason og Kerrie Struhs, eru hluti af litlum og nánum trúarhópi í borginni Toowoomba. Ástralskir fjölmiðlar segja hópinn ekki tengjast neinni stórri kirkju í landinu.

Lögreglan segir foreldrana, ásamt öðrum, hafa beðið fyrir því að Elizabeth myndi batna. Yfirvöld voru ekki látin vita fyrr en degi eftir að hún dó.

mbl.is
Fleira áhugavert
Fleira áhugavert