173 almennir borgarar fallið í átökum í Suður-Súdan

Fjöldi óbreyttra borgara féll í átökum í Suður-Súdan í febrúar og maí á þessu ári. Auk þess urðu konur og börn fyrir líkamsárásum samkvæmt skýrslu Sameinuðu þjóðanna.

Átök hersveita sem eru hliðhollar Salva Kiir forseta og keppinautar hans, Riek Machar varaforseta, í Unity-fylki náðu til að minnsta kosti 28 þorpa í þremur sýslum. Féllu 173 manns í átökunum og 37 konum og börnum var rænt.

Mörg þeirra sem var rænt urðu fyrir kynferðisofbeldi. Fórnarlömbin voru allt niður í átta og níu ára gamlar stúlkur. Ofbeldið varð til þess að 44.000 manns flúðu heimili sín en alls var skráð 131 tilfelli af nauðgunum og hópnauðgunum.

• Blogga um frétt