Leit hefur verið hætt að fórnarlömbum flugskeytaárásar Rússa síðastliðið laugardagskvöld á íbúðarhús í borginni Dnípró í Úkraínu. Minnst 45 eru látin og 79 særð en 20 er enn saknað. Stjórnvöld í Rússlandi hafa neitað að lýsa ábyrgð á hendur sér.
Meðal hinna látnu voru sex börn, hið yngsta var aðeins 11 mánaða gamalt.
Antonio Guterres, framkvæmdastjóri Sameinuðu þjóðanna fordæmdi árásina og sagði hana líklega falla undir stríðsglæpi.
Samtökin Support for Ukraine Iceland boðuðu til mótmæla fyrir utan rússneska sendiráðið í gærkvöld vegna stríðsreksturs Rússa og eldflaugaárásarinnar á Dnípró og annarrar á Kænugarð.