Frá og með september mun lögreglan í Lundúnum ekki sinna útköllum þar sem fólk með andleg veikindi kemur við sögu, nema um beina lífsógn sé ræða. Ákvörðunin er umdeild og hefur fyrrverandi yfirmaður bráðaþjónustu í borginni sagt að ákveðið tómarúm kunni að myndast sem valdi því að andlega veiku fólki verði ekki sinnt. BBC greinir frá.
Fulltrúi Lundúnalögreglunnar gerði heilbrigðisstofnunum og félagsþjónustu í borginni grein fyrir ákvörðuninni í síðustu viku. Breytingarnar eiga að koma í veg fyrir að fjöldi lögreglumanna festist í slíkum útköllum og séu í staðinn lausir til að takast á við önnur verkefni.
Útköllum þar sem andleg veikindi koma við sögu hefur fjölgað mikið á síðustu fimm árum og telja margir lögreglustjórar að fólk noti lögreglu sem fyrsta viðbragð þegar andlega veikir einstaklingar þurfi hjálp, vegna skorts á getu heilbrigðiskerfisins til að sinna fólki og úrræðaleysis félagsþjónustunnar í þeim efnum.
Ábyrgð á að veita heilbrigðisþjónustu er þannig varpað yfir á lögregluna en breytingin er tilraun lögreglunnar til að færa ábyrgðina þangað sem hún á heima, enda séu lögregluþjónar ekki menntaðir til að veita heilbrigðisþjónustu.
Zoe Billingham, fyrrverandi yfirmaður bráðaþjónustu hjá borginni, segir að eins og staðan sé nú sé víða ekki hægt að mæta þörfum þessara einstaklinga sem þurfi þó á þjónustu að halda. Stundum þurfi að bregðast skjótt við og í mörgum tilfellum sé ekki hægt að hringja neitt annað en í lögregluna. Engin önnur stofnun geti fyllt upp í það skarð sem myndast, hætti lögreglan að sinna þessum einstaklingum.
Ken March, formaður sambands lögreglumanna í Lundúnum, fagnar ákvörðuninni. Hann segir lögreglumenn oft þurfa að bíða upp í 12 tíma á sjúkrahúsum með andlega veikum sjúklingum eða fólki með elliglöp, sem þeir hafa sinnt vegna útkalla.
Hann segist þó gera ráð fyrir að þetta verði ekki alveg svona klippt og skorið. Lögreglan muni eflaust áfram fara í flest útköll af ótta við hvaða afleiðingar það gæti haft að gera það ekki. Hver og einn lögreglumaður beri ábyrgð á gjörðum sínum á vettvangi og enginn vilji hafa það á samviskunni eða þurfa að svara fyrir að hafa sleppt mikilvægu útkalli.
Billingham er sammála því að eflaust verði áfram farið í einhver útköll, en varar við því að þróunin geti verið hættuleg.