Javier Milei, forseti Argentínu, segir sósíalískar hugmyndir ógna Vesturlöndum og að hinn frjálsi markaður sé eina lausnin gegn fátækt í heiminum.
Þessi orð lét hann falla á heimsviðskiptaráðstefnunni í Davos sem haldin er um þessar mundir.
„Ég er hér til þess að segja ykkur að Vesturlöndin eru í hættu,“ sagði Milei á ráðstefnunni í sinni fyrstu opinberu utanlandsferð sem forseti.
Þá hampaði hann hinum frjálsa markaði og sagði hann vera einu lausnina við fátækt í heiminum. Í kjölfarið skaut hann föstum skotum á „öfgakenndan femínisma“, þungunarrof og pólitískan rétttrúnað.
Að lokum lofaði Milei viðskiptajöfra sem hetjur og sagði þá eigi þurfa að óttast álit stjórnmálastéttarinnar og „sníkjudýranna sem lifa á kostnað ríkisins“.
„Ríkið er ekki lausnin. Ríkið er vandinn,“ sagði hann og endaði ræðuna á vígorðum sínum: „Lengi lifi frelsið, andskotinn!“