Tveir voru drepnir, þar á meðal barn, eftir að Úkraínumenn skutu árásardrónum á Rússland og Krímskaga í nótt.
Eldur kviknaði einnig í olíuhreinsistöð, að sögn rússneskra embættismanna.
Árásin var sú umfangsmesta af hálfu Úkraínumanna í margar vikur og varð gerð á sama tíma og hersveitir Rússa hafa sótt fram og sölsað undir sig sífellt stærra landsvæði í Úkraínu.
Rússneski herinn sagðist hafa stöðvað meira en 100 dróna sem komu úr lofti eða frá hafi í suðurhluta landsins og fóru yfir Krímskaga og Svartahaf í nótt.