51 lét lífið og 20 særðust í sprengingu í kolanámu í ríkinu Suður-Khorasan í Íran í gærkvöldi.
Sprengingin varð vegna gasleka en um er að ræða banvænasta vinnuslys í landinu í áraraðir.
Samkvæmt fréttaflutningi af málinu í Íran leiddi leki af metangasi til sprengingarinnar sem varð í tveimur hlutum námunnar sem er í eigu íranska einkafyrirtækisins Madanjoo.
Ríkissjónvarp Írans hefur sýnt myndskeið af sjúkrabílum og þyrlum á leið á námusvæðið til að flytja slasaða á sjúkrahús.
Sömuleiðis sýndu myndskeið frá sjónarvottum lík nokkurra fórnarlamba sprengingarinnar borin út úr námunni í námukerrum.
Javad Ghenaat, ríkisstjóri Suður-Khorasan þar sem sprengingin varð, sagði í viðtali við ríkissjónvarpið að björgunarsveitir væru þessa stundina að vinna að því að endurheimta lík þeirra sem létust í sprengingunni.
Þá vottaði Masoud Pezeshkian, forseti Írans, fjölskyldum fórnarlambanna samúð sína í ávarpi áður en hann hélt á allsherjarþing Sameinuðu þjóðanna í New York og fyrirskipaði sömuleiðis rannsókn á atvikinu.