Eric Adams, borgarstjóri New York, mætti fyrir dóm í dag þar sem hann svaraði fyrir sakargiftir í ákæru dómsmálaráðuneytis Bandaríkjanna. Er hann m.a. sakaður um mútuþægni, fjársvik og hafa þegið ólöglega pólitíska styrki frá erlendum aðilum.
Adams svaraði ekki spurningum blaðamanna er hann mætti í dómsal en hefur lýst yfir sakleysi sínu. Hann biður fólk um að bíða með að dæma hann þar til hann fær að segja sína hlið á málinu.
Héraðssaksóknarinn Damian Williams sagði borgarstjórann hafa þegið gjafir árum saman.
„Háttsemin sem ákært er fyrir – erlendu fjármunirnir, fjármunir frá fyrirtækjum, leyndarhyggja árum saman – er grafalvarlegt brot á trausti almennings,“ sagði Williams.
Ákæran er 57 blaðsíðna löng og þar segir að Adams hafi þegið fyrsta farrýmis flugferðir víða um heim, hótelsvítur og gjaldfrjálsar máltíðir á lúxus veitingastöðum – meðal annars frá tyrkneskum embættismanni – gegn greiðum.
Saksóknarar segja Adams til dæmis hafa þrýst á slökkvilið borgarinnar að samþykkja nýja ræðisskrifstofu fyrir Tyrkland í Manhattan þrátt fyrir áhyggjur um öryggi háhýsisins.