NATO-bækistöðvar Finnlands verða staðsettar í borginni Mikkeli. Þetta sagði finnski varnarmálaráðherrann, Antti Häkkänen, á blaðamannafundi í dag.
„Stofnun bækistöðvanna er mikilvægt skref í átt að sterkari varnarstöðu NATO-ríkjanna,“ sagði ráðherrann í yfirlýsingu.
Mikkeli er í suðausturhluta Finnlands og um 200 kílómetrum frá landamærum Finnlands og Rússlands. Finnski herinn er einnig með aðsetur í Mikkeli en hann mun áfram bera ábyrgð á varnarmálum Finnlands.
Nokkrir tugir manna frá nokkrum aðildarríkjum NATO munu koma til með að starfa í bækistöðvunum til að byrja með.
Finnland gekk í NATO á síðasta ári og varð þar með 31. aðildarríki bandalagsins.