Kæra leka Landspítalans

Lögmaður ungra hjóna sem ættuð eru frá Víetnam segir að þau muni að öllum líkindum kæra Landspítalann til lögreglu vegna leka á persónuupplýsingum um þau. Útlendingastofnun hefur synjað konunni um varanlegt landvistarleyfi, meðal annars vegna upplýsinga sem virðast hafa komið frá spítalanum.

Í samtali við fréttastofu RÚV segir lögmaður hjónanna að í gögnum máls þeirra hjá Útlendingastofnun komi fram að upplýsingar hafi borist í símtali frá Landspítalanum um háttalag þeirra. Útlendingastofnun telur að hjónaband þeirra hafi aðeins verið til málamynda og byggir það meðal annars á myndbandsupptöku úr brúðkaupi þeirra.

„Þeirra eina tilkynningaskylda er við barnavernd, ef grunur leikur á að eitthvað sé ekki í lagi. Þannig að svo virðist sem miðlun upplýsinganna frá Landspítalanum til Útlendingastofnunar hafi verið ólögmæt í alla staði. Þar með lít ég svo á að Útlendingastofnun hafi verið með öllu óheimilt að byggja á þessum upplýsingum. Hvað þá að senda þau áfram í bréfi til lögreglunnar á höfuðborgarsvæðinu,“ segir Björg Valgeirsdóttir, lögmaður konunnar, við RÚV.

Í skriflegu svari Landspítalans til fréttastofunnar kom fram að málið sé til skoðunar og það sé litið alvarlegum augum ef rétt reynist.

Frétt RÚV um mál hjónanna

• Blogga um frétt