„Víkingaskip sem þolir ýmislegt“

Ketill Magnússon, eigandi víkingaskipsins Vésteins sem sökk í smábátahöfninni á Granda í kvöld, mætti í morgun til að festa skipið betur við höfnina. Þá virtist allt vera í góðu lagi.

Frétt mbl.is: Víkingaskipið sökk í storminum 

Skipið er bundið vestan megin við bryggjuna. Það gusaðist yfir það í óveðrinu í kvöld og fór mikið vatn inn í skipið.

Að sögn Ketils er lensdæla í skipinu, sem á að sjá til þess að dæla vatni upp úr því, en ef til vill hefur henni slegið út.

Spurður út í tjónið segist hann ekki gera sér alveg grein fyrir því. „Þetta er náttúrulega víkingaskip. Það þolir ýmislegt,“ segir hann.

Frétt mbl.is: Kafarar kanna aðstæður í höfninni

Híft upp í kvöld 

Ákveðið hefur verið að hífa víkingaskipið upp úr smábátahöfninni síðar í kvöld. Kafarar munu setja belgi hvora sínu megin við skipið og verða bönd sett á milli belgjanna undir kjölinn.

Að sögn Gísla Hallssonar yfirhafnsögumanns verður blásið upp í belgina og skipinu svo lyft aðeins upp. Því verður síðan fleytt að bryggjunni.

Sigldi með ferðamenn um síðustu helgi

Skipið, sem er fjögurra tonna þungt, verður því næst flutt með vörubíl í Snarfarahöfn.

Víkingaskipið Vésteinn var smíðað á Þingeyri árið 2008 og hefur það verið duglegt að sigla með ferðamenn í allt sumar. Síðasta ferðin sem það fór var um síðustu helgi.