Tónlistarhúsið Harpa og Sagafilm leiða saman hesta sína og bjóða fólki að heimsækja Expo-skálann í Hörpu alla daga í júlí og ágúst milli 10:30 og 17:30.
Almennt miðaverð er 1.500 krónur en nemendur, eldri borgarar og öryrkjar greiða 1.250 krónur. Ókeypis er inn fyrir börn undir 16 ára.
Expo-skálinn var fyrst settur upp á heimssýningunni í Sjanghæ árið 2010 og var endurreistur sem landkynning Íslands á bókamessunni í Frankfurt ári seinna. Þá var hann sömuleiðis settur upp í Hörpu árið 2012 og Brimhúsinu 2013.
Í skálanum verður sýnd 15 mínútna kvikmynd sem Sagafilm framleiðir. Um þrjár milljónir manna hafa séð myndina en markmið hennar er að gestir fái að upplifa Ísland í návígi en íslensk náttúra er í forgrunni.
Sýningin verður áfram í vetur.