Lokahátíð Syrpurappsins fer fram í Smáralindinni klukkan eitt í dag, en syrpurapp er keppni ætluð krökkum á aldrinum 7-12 ára þar sem keppt er um besta íslenska rapptextann. Streymt verður frá keppninni í beinni á mbl.is.
Verðlaun verða fyrir efstu þrjú sætin í keppninni samkvæmt niðurstöðu dómnefndar og netkosningar. Í dómnefnd voru Úlfur Úlfur, Íris Edda Nowenstein íslenskufræðingur og María Johnson frá Eddu útgáfu.
Keppnin hófst í nóvember og voru lokaskil á textum 17. des. 10 bestu textarnir, að mati dómnefndar, voru síðan settir á netið 27. desember og gat almenningur þar kosið þann texta sem honum fannst bestur.
Mjög góð þátttaka var í keppninni og fjöldinn allur af mjög góðum textum barst og því var val dómnefndar vandasamt.
Vinningshafinn fær tækifæri til að eyða tíma í Stúdío Sýrlandi með strákunum í Úlfi Úlfi við upptökur og framleiðslu á laginu sínu. Að auki fær hann 10 stúdío tíma í Stúdío Sýrlandi ásamt árs áskrift að Syrpu.