Vegagerðin kynnti í haust tillögur til úrbóta á Hafnarfjarðarvegi í gegnum Garðabæ. Þær fólu í sér talsverðar breytingar á samgöngumannvirkjum og átti að ráðast í framkvæmdir í vor.
Bæjaryfirvöld í Garðabæ hafa nú óskað eftir því við Vegagerðina að skoðaðar verði endurbætur sem séu umfangsminni en fyrri tillögur og fram fari greining á öðrum lausnum og kostnaði.
Í umfjöllun um mál þetta í Morgunblaðinu í dag segir Gunnar Einarsson bæjarstjóri að samkvæmt aðalskipulagi Garðabæjar frá 2006 sé miðað við að Hafnarfjarðarvegur verði lagður í stokk milli Vífilsstaðavegar og Lyngáss og þar verði mislæg gatnamót. Stokkalausn sé enn helsta krafa bæjaryfirvalda en tillögurnar séu ekki í samræmi við aðalskipulag.