Slökkviliðið á höfuðborgarsvæðinu sinnir nú í tveimur stórum útköllum vegna mikilla vatnsleka í Ögurhvarfi og Breiðholtsskóla. Bæði útköllin bárust um hálfáttaleytið í morgun.
Auk fjölmenns liðs slökkviliðsmanna vinnur gröfubíll frá Kópavogsbæ nú einnig að því að útbúa annan farveg fyrir vatnið sem berst inn í Ögurhvarf 6 utan frá. Segir slökkviliðið stífluð niðurföll m.a. ástæðu fyrir vatnselgnum.
Þá er mikill vatnsleki einnig í Breiðholtsskóla og hefur vatnið m.a. borist inn í íþróttahús skólans og er fjölmennt lið slökkviliðsmanna einnig að störfum þar.
Nóttin var annars róleg að sögn slökkviliðsmanns á vakt, en þó var farið í útköll vegna 3-4 minni háttar vatnsleka í nótt.