„Furðuleg“ umræða í garð Gylfa

Gylfi Arnbjörnsson, forseti ASÍ, og Ragnar Þór Ingólfsson, formaður VR.
Gylfi Arnbjörnsson, forseti ASÍ, og Ragnar Þór Ingólfsson, formaður VR. Samsett mynd

Ingibjörg Ósk Birgisdóttir, 2. varaforseti ASÍ og stjórnarmaður í VR, segir umræðu Ragnars Þórs Ingólfssonar, formanns VR, í garð forseta ASÍ vera furðulega.

Ragnar Þór hefur talað um að hann geti ekki starfað með Gylfa og verði ný stjórn Eflingar kosin verði Gylfa ekki sætt lengur í embætti forseta.

„Umræðan af hans hálfu í garð Gylfa hefur verið mjög furðuleg,“ segir Ingibjörg Ósk og kveðst ekki hafa orðið vör við það í kosningabaráttu Ragnars Þórs fyrir ári að hann hafi viljað koma Gylfa frá völdum.

Ingibjörg Ósk Birgisdóttir.
Ingibjörg Ósk Birgisdóttir. mbl.is/Sigurður Bogi

Spurð út í ummæli Ragnars Þórs við Morgunblaðið í gær um að atkvæðagreiðsla um mögulega úrsögn VR úr ASÍ muni líklega fara fram í haust segist Ingibjörg Ósk vera algjörlega mótfallin því að VR fari úr ASÍ. „Ég er hlynnt samvinnunni og samstöðunni,“ segir hún.

Hugmyndir um húsnæðisleigufélag skoðaðar áfram

Samþykkt var á fundi trúnaðarráðs VR í gærkvöldi að halda áfram að skoða hugmyndir um að VR stofni húsnæðisleigufélag.

„Þetta er á teikniborðinu. Það þarf að vinna þetta mjög vel áður en endanleg ákvörðun er tekin,“ segir Ingibjörg Ósk.

Miðað við hve málið er stórt á hún von á því að það fari í almenna kosningu hjá félagsmönnum um hvort farið yrði í slíkan rekstur.

Í síðustu viku greindi Fréttablaðið frá hugmyndum um að nýta sjóði VR til að koma leigufélagi á fót sem myndi leigja íbúðir á 15 til 30 prósenta lægra verði en gengur og gerist á almennum leigumarkaði.

Hús verslunarinnar.
Hús verslunarinnar. mbl.is/Ómar

Fleiri í framboði en áður 

Fram kom á vefsíðu VR í gær að 27 einstaklingar hefðu boðið sig fram í stjórn félagsins. Að sögn Stefáns Sveinbjörnssonar, framkvæmdastjóra VR, eru þetta fleiri umsækjendur en verið hefur.

Framboðsfresturinn rann út síðastliðinn föstudag. Kosið verður til sjö sæta í stjórn VR og þriggja í varastjórn í byrjun mars. Nákvæm dagsetning hefur ekki verið ákveðin en kosningunum á að vera lokið fyrir 15. mars.

mbl.is

Bloggað um fréttina

Fleira áhugavert
Fleira áhugavert