Sigmundur Davíð Gunnlaugsson, formaður Miðflokksins, og Alma Möller, nýr landlæknir, verða gestir Páls Magnússonar í þjóðmálaþættinum Þingvellir á K100 klukkan 10 á morgun.
Páll mun meðal annars ræða við Sigmund Davíð um þingsályktunartillögu þess efnis að Alþingi lýsi því yfir að rangt hafi verið að leggja til málshöfðun gegn fjórum ráðherrum þann 28. september 2010 vegna starfa þeirra í ríkisstjórn Íslands fyrir efnahagshrunið árið 2008. Auk þess eigi ráðherrarnir skilið afsökunarbeiðni frá hlutaðeigandi aðilum.
Er Sigmundur fyrsti flutningsmaður tillögunnar en alls eru 15 flutningsmenn. Þess má geta að Páll er einn af þeim. Því næst mun Páll ræða við Ölmu Möller sem tók við embætti landlæknis þann 1. apríl.
Björt Ólafsdóttir, formaður Bjartrar framtíðar, og Páll Magnússon, þingmaður Sjálfstæðisflokksins, skipta með sér þáttastjórn og á páskadag var fyrsti þáttur Þingvalla þar sem Björt ræddi við Agnesi M. Sigurðardóttur biskup Íslands. Hér er hægt að hlusta þá fyrsta þáttinn í heild sinni.
Þátturinn verður á dagskrá alla sunnudaga og pólitík og málefni líðandi stundar verða í forgrunni í þættinum.