Söngvari útskrifast sem skipstjóri

Ekki einasta syngur tónlistarmaðurinn Kristján Kristjánsson, KK, sjómannalög heldur er hann rétt að ljúka námi við Tækniskólann og fær í vor skipstjórapróf gangi allt upp.

Til slíks þarf svonefnd BS-réttindi en þau gefa heimild til að stýra allt að 45 metra löngum skipum, svo sem farþegabátum, flestum fiskiskipum og minni togurum, að því er fram kemur í Morgunblaðinu í dag.

„Ég tók pungaprófið svonefnda fyrir mörgum árum og hef lengi átt lítið færeyskt trilluhorn, Æðruleysið, sem ég hef stundum gert út á strandveiðarnar á sumrin. Mér hefur fundist þetta skemmtilegt enda held ég að sjómannsblóð sé í æðum allra Íslendinga,“ segir KK sem byrjaði haustið 2016 í skipstjórnarnáminu og stefndi þá á réttindi á 24 metra löng skip. Þegar í ljós kom að ekki þurfti að bæta við nema fáeinum fögum og námseiningum til að fá réttindi á 45 metra skip var sjálfsagt að stíga skrefið til fulls.