Ísland hýsir afvopnunarráðstefnu NATO

Katrín Jakobsdóttir, forsætisráðherra, hefur boðið fulltrúum ICAN, alþjóðlegra samtaka sem berjast fyrir eyðingu kjarnorkuvopna, að koma til Íslands í október þar sem Ísland mun hýsa afvopnunarráðstefnu NATO.

Katrín fundaði með fulltrúum ICAN á leiðtogafundi Atlantshafsbandalagsins í Brussel sem lauk í dag. Katrín sagði í samtali við mbl.is áður en fundurinn hófst að hún hygðist ætla að bjóða ICAN-samtökunum að sækja Ísland heim í tengslum við afvopnunarráðstefnuna. 

Frétt af mbl.is

Katrín mun ræða friðsælar lausnir

Fulltrúum ICAN verður boðið að taka þátt í hliðarviðburði á ráðstefnunni „enda er mjög mikilvægt að samtal eigi sér stað milli ríkja Atlantshafsbandalagsins og þeirra grasrótarsamtaka sem hafa staðið fremst í flokki í baráttunni fyrir afvopnun,“ segir í tilkynningu frá forsætisráðuneytinu. Samtökin fengu friðarverðlaun Nóbels í fyrra fyrir ötula baráttu sína gegn kjarnorkuvopnum.

Katrín sagði í samtali við blaðamann mbl.is að fundi loknum að umræða um framlög til varnarmála hefði verið mest áberandi á fundinum. „Staðan er óbreytt, staðreyndir er auðvitað sú að aðildarríkin hafa verið að auka sín framlög og ákveðið var að ríkin myndu halda sér við þau plön sem liggja fyrir í þeim efnum. Niðurstaðan var sameiginleg um að halda fyrri stefnu í þessu máli,“ segir Katrín.

Boðað var til sérstaks fundar um fjármögnun varnarmála í dag en þar var rætt um þá ákvörðun sem tekin var í Wales 2014 að aðildarríkin stefni að því að 2% af vergri landsframleiðslu renni til varnarmála. „Þessi ákvörðun er enn í fullu gildi enda hafa öll ríki bandalagsins aukið framlög sín á þessu sviði,“ segir í tilkynningu frá forsætisráðuneytinu.

• Blogga um frétt