Elín Sigurgeirsdóttir, formaður Tannlæknafélags Íslands, mælir með því að fólk fari að með gát þegar það bítur í jólakræsingarnar. Á þessum árstíma er jafnan talsvert um að fólk leiti til tannlækna vegna þess að það brýtur tennur sínar á hnetum og stökkri steikarskorpu og það getur verið bæði sársaukafullt og dýrt.
„Við tannlæknar verðum talsvert vör við þetta á þessum árstíma, eiginlega alveg frá því að jólahlaðborðin byrja,“ segir Elín. „Fólk brýtur tennurnar með því að bryðja skorpuna á purusteikum. Stundum er sökudólgurinn hnetuskurn sem hefur ef til vill ekki verið nægilega fjarlægð og loðir við hnetuna sem fer svo í sósu eða einhvern rétt þannig að skurnin er ekki sýnileg og fólk bítur í hana.“
Í Morgunblaðinu í dag segir Elín að alvarlegustu tilvikin af þessu tagi verði þegar bitið er í högl sem verða eftir í rjúpum.