Leggja til að nýtt torg heiti Boðatorg

Verktakar vinna nú að því að útbúa nýtt torg á mótum Tryggvagötu og Geirsgötu, fyrir framan hið nýja 106 herbergja Exeter-hótel.

Fram kemur í gögnum frá Reykjavíkurborg að skrifstofa samgöngustjóra hafi lagt til að torgið fengi heiti Naustatorg.

Nafnanefnd Reykjavíkur þótti þetta heiti ekki eiga við, þar sem Naustin eru nokkru sunnar og austar, milli Hafnarstrætis og Tryggvagötu. Leggur nafnanefndin til að umrætt torg fái heitið Boðatorg. Borgarráð mun eiga síðasta orðið um nafnið á torginu, að því er fram kemur í Morgunblaðinu í dag.