Vilja byggja flugstöð

KEA býðst til að reisa fyrir eigin reikning og leigja ríkinu viðbyggingu við flugstöðina á Akureyrarflugvelli til að þjóna millilandafluginu. Fyrirtæki í ferðaþjónustu sem hafa verið að þróa nýjar hugmyndir um uppbyggingu telja unnt að gera það á stuttum tíma og með minni kostnaði en rætt hefur verið um.

Halldór Jóhannsson, framkvæmdastjóri KEA, segir að aðstaða í flugstöðinni sé óviðunandi fyrir millilandaflug. Hún sé of lítil og geti ekki þjónað almennilega meðalstórum þotum.

Eins og áður hefur komið fram skipuleggur ferðaskrifstofa ferðir frá borgum í Bretlandi beint til Akureyrar og áformað er að slíkt flug hefjist frá Hollandi á vormánuðum. Fyrirtæki í ferðaþjónustu óttast áhrif þess á starfsemina að núverandi flugstöð rúmar ekki farþega í millilandaflugi með góðu móti og hamli það frekari þróun þess.

Áætlanir hafa verið um uppbyggingu aðstöðu á flugvellinum en stækkun flugstöðvarinnar er ekki komin á áætlun. „Það þarf að fara hraðar í stækkun flugstöðvarinnar en áætlanir hafa verið um, ef á annað borð ætlunin er að stunda millilandaflug frá Akureyrarflugvelli,“ segir Halldór. Ferðaþjónustufyrirtækin Höldur og SBA hafa unnið með KEA að nýjum áætlunum sem kynntar hafa verið samgönguráðherra og Isavia.