Fimm til sex einstaklingar hafa verið fluttir á slysadeild frá skíðasvæðinu í Bláfjöllum um helgina. Að minnsta kosti eitt beinbrot varð í gær og einn missti meðvitund eftir að hafa hlotið höfuðhögg, auk þess sem smávægileg meiðsli hafa orðið.
Þetta segir varðstjóri hjá slökkviliðinu á höfuðborgarsvæðinu.
Sá sem varð fyrir höfuðhögginu fékk aðhlynningu í sjúkraherbergi skíðaskálans í Bláfjöllum og náði smám saman áttum.
Lögreglan á höfuðborgarsvæðinu greindi frá því fyrir skömmu að tilkynnt hefði verið um eitt skíðaóhapp laust fyrir klukkan 13 í dag.
Helgin er sú fyrsta sem hefur verið opin í vetur í Bláfjöllum og hefur fjöldi fólks nýtt sér tækifærið og skellt sér á skíði.