Mældust á 144 og 146 km hraða

Fimmtán ökumenn hafa verið kærðir fyrir of hraðan akstur í umdæmi lögreglunnar á Suðurnesjum á síðustu dögum. Athæfi tveggja þeirra flokkast undir ofsaakstur því bifreiðir þeirra mældust á 144 og 146 km hraða þar sem hámarkahraði er 90 km á klukkustund.

Sá sem ók hraðar hafði ekki náð 18 ára aldri og var forráðamönnum hans gert viðvart um brot hans, að því er segir í tilkynningu frá lögreglunni á Suðurnesjum.

Alls töluðu sjö í síma undir stýri án þess að nota áskilinn búnað og skráningarnúmer voru fjarlægð af fjórum bifreiðum sem voru óskoðaðar eða ótryggðar. Fjórir voru teknir úr umferð vegna gruns um fíkniefnaakstur. Einn þeirra var með gasbyssu og veiðihníf í fórum sínum og gerðist þar með að auki brotlegur við vopnalög.

• Blogga um frétt