Vilja Skógaheiði lokaða fram í júní

Umhverfisstofnun vill að gönguleiðin á Skógaheiði ofan við Fosstorfufoss verði lokuð fram til 1. júní vegna „verulegrar hættu á tjóni“.

Starfsmenn Umhverfisstofnunar fóru á staðinn og gerðu úttekt á svæðinu á mánudag og telja þeir ekki æskilegt að opna svæðið fyrir umferð ferðamanna fyrr en þá, að því er fram kemur í frétt á vef stofnunarinnar.

Lög um náttúruvernd kveða á um að staðfesting ráðherra sé áskilin ef loka á svæði lengur en í tvær vikur. Segir þar að ef „veruleg hætta er á tjóni af völdum mikillar umferðar eða vegna sérstaklega viðkvæms ástands náttúru getur Umhverfisstofnun ákveðið að takmarka umferð eða loka viðkomandi svæði tímabundið fyrir ferðamönnum að fenginni tillögu hlutaðeigandi sveitarfélags [Landgræðslunnar] 1) eða landeiganda eða að eigin frumkvæði.“

Hefur Umhverfisstofnun óskað eftir umsögnum og samráði varðandi framlengingu lokunarinnar og rennur frestur til að skila þeim inn fimmtudaginn 7. mars kl. 14.

• Blogga um frétt