Björgunarskip og bátar Slysavarnafélagsins Landsbjargar á Ísafirði og Bolungarvík hafa verið ræst út vegna báts sem sendi út neyðarkall í Jökulfjörðum.
Samkvæmt fyrstu upplýsingum er báturinn strandaður og kominn leki að honum.
Björgunarmenn eru á leið á staðinn með dælur en nokkur stund er þar til þeir koma á staðinn, að því er kemur fram í tilkynningu.
Uppfært kl. 10.20:
Einn maður er í bátnum.
Að sögn Jónasar Guðmundssonar hjá Landsbjörg er lítil sem engin hætta á ferðinni og eru aðstæður með betra móti. Björgunarskip er komið hálfa leiðina að bátnum.
Þyrla Landhelgisgæslunnar er á leiðinni á staðinn.
Uppfært kl. 11.20:
Björgunarskipið Gunnar Friðriksson er komið að bátnum, auk þyrlu Landhelgisgæslunnar og björgunarskipsins Gísla Hjalta.
Skipstjórinn var kominn í björgunargalla til öryggis en maðurinn er í góðu ásigkomulagi. Unnið er að því að finna lausn varðandi bátinn hans og hvort hægt sé að koma í veg fyrir lekann.