Stúlkur fá mun síðar einhverfugreiningu

„Ég hef alltaf haft algjört límminni, ýmis séráhugamál og svo er það hitt og þetta eins og að ég hef aldrei getað eða kunnað að stunda „smalltalk“ – svona létt spjall um ekkert. Þá er gelgjan í hálfgerðri þoku, þar sem unglingsárin snúast um tvíræð og óljós skilaboð í einhverjum augngotum.“

Þetta segir Guðlaug S. Kristjánsdóttir, bæjarfulltrúi í Hafnarfirði, um það að vera með Asperger-heilkennið.

Guðlaug greindist fyrir um ári með Asperger en stúlkur á einhverfurófinu greinast mun síðar en drengir. Hluti af ástæðunni er þekkingarskortur en einkenni kvenna á rófinu eru önnur en hjá körlum.

Á alþjóðlegum degi einhverfu verður íslensk heimildarmynd, Að sjá hið ósýnilega, frumsýnd en í myndinni er spjallað við 17 konur á einhverfurófinu og skyggnst inn í líf þeirra. Sunnudagsblað Morgunblaðsins hitti fimm þeirra.