Náttúruverndarfrumvarp á haustþingi

Umhverfisráðherra hyggst ekki leggja fram frumvarp um breytingar á náttúruverndarlögum á vorþinginu.

Þetta staðfestir Sigríður Víðis Jónsdóttir, aðstoðarmaður ráðherra í Morgunblaðinu í dag. Frumvarpsdrög, sem lúta að almannarétti, útivist og umgengni og þeim kafla gildandi laga sem fjallar um innflutning og dreifingu á lifandi framandi lífverum, voru kynnt á samráðsgátt stjórnvalda í febrúar og mars.

Fjöldi umsagna barst, einkum um almannaréttarþáttinn. „Ráðuneytið telur mikilvægt að vinna vel úr þeim ábendingum og athugasemdum sem því bárust. Ráðherra hyggst leggja frumvarpið fram á næsta löggjafarþingi,“ segir Sigríður Víðis.