Innlent | mbl | 9.5.2019 | 11:48 | Uppfært 12:35

Yngri karlar líklegri til að vilja taka pilluna

Í dag er aðeins í boði getnaðarvarnapilla fyrir konur, en ef slíkt væri í boði fyrir karla væru um 55% íslenskra karla til í að taka hana að staðaldri. mbl.is/Kristinn Ingvarsson

Yngri karlmenn eru líklegri til að vilja taka getnaðarvarnarpillu að staðaldri ef slíkt væri í boði. Þetta kemur fram í niðurstöðum könnunar sem MMA framkvæmdi í febrúar. Um 55% karlmanna sögðust frekar eða mjög jákvæð gagnvart því að taka getnaðarvarnarpilluna og reyndust karlar á höfuðborgarsvæðinu líklegri (60%) en þeir af landsbyggðinni (48%) til að vera jákvæðir.

Aldurshópurinn 18-29 ára var líklegastur til að taka jákvætt í að nota slíka getnaðarvörn, eða 63% svarenda. Jákvæðnin fer svo þverrandi með hækkandi aldri, en þannig sögðust 61% karla á aldrinum 30-49 ára jákvæð og 45% á aldrinum 50-67 ára. Svipaða sögu var að segja hjá þeim sem eru 68 ára og eldri, en 46% þeirra sögðust jákvæð fyrir þessari leið.

Lesa má nánar um niðurstöðurnar á vef MMR.

Könnunin var framkvæmd dagana 11. til 15. febrúar 2019 og var heildarfjöldi svarenda 934 einstaklingar, 18 ára og eldri. Spurningarnar voru lagðar fram sem hluti af könnunarvagni MMR.