Alls bárust um 60 athugasemdir vegna fyrirhugaðrar byggingar íbúðakjarna fyrir fatlað fólk í Hagaseli í Breiðholti. Umhverfis- og skipulagssvið Reykjavíkurborgar fer yfir allar athugasemdir sem bárust og verður þeim svarað með rökstuðningi.
Stór hluti þeirra eru athugasemdir meðal annars við nálægð við öryggisvistun ríkisins í Rangárseli. Sú öryggisvistun er tímabundin.
„Þetta eru margar athugasemdir,“ segir Berglind Magnúsdóttir skrifstofustjóri öldrunar- og húsnæðismála á velferðarsviði Reykjavíkurborgar.
Hún segir athugasemdirnar í takt við þá gagnrýni sem hefur komið fram hjá íbúum í nágrenninu. Fjölmargir skrifuðu nafn sitt á mótmælalista vegna fyrirhuguðum íbúðakjarna þar sem bent er á nálægð við fyrrgreinda starfsemi.
Starfsmenn borgarinnar og stjórnmálamenn hafa varað við fordómum gegn geðfötluðum. Í bókun Mannréttinda- og lýðræðisráðs Reykjavíkurborgar frá 12. apríl er meðal annars bent á að þrautseig mýta sé að fylgni sé á milli geðfötlunar og þess að beita ofbeldi.
Ekki liggur fyrir hvenær endanleg ákvörðun verður tekin. Þegar umhverfis- og skipulagssvið hefur lokið við að svara efnislega öllu athugasemdir verður málið skoðað hjá velferðarsviði áður en umhverfis- og skipulagsráð tekur endanlega ákvörðun.