„Þetta kemur sér mjög illa núna. Þetta eru utanaðkomandi aðstæður ofan á aðra óáran. Það er einhver kólnun í hagkerfinu sem er samspil margra þátta. Vonandi fer þetta upp á við á næsta ári,“ segir Unnur Sverrisdóttir forstjóri Vinnumálastofnunar um uppsagnir Icelandair á flugmönnum í dag.
Icelandair sleit ráðningasamningi við 24 flugmenn sem hófu þjálfun á MAX vélarnar síðasta haust og höfðu hafið störf áður en vélarnar voru kyrrsettar. Einnig var stöðvuð þjálfun 21 nýliða sem til stóð að hæfu störf sem flugmenn á Boeing 737 MAX vélar félagsins í sumar.
Spurð um uppsagnir í maímánuði sagði Unnur að ekki væri hægt að gefa upplýsingar um þann fjölda. Þær upplýsingar lægju fyrir líklega eftir helgi.