Flugvél með mjaldrana tvo innanborðs lenti á Keflavíkurflugvelli klukkan 13:41 í dag. Flugvélin flaug yfir Vestmannaeyjar áður en hún lenti í Keflavík. Nú er unnið að því að skipta um vatn í búrunum þeirra áður en þeir verða fluttir með vöruflutningabílunum til Landeyjahafnar í dag.
Fulltrúar MAST eru nú að skoða mjaldrana og gefa út formlegt leyfi til flutningsins.
Nokkur mannfjöldi var mættur til að fylgjast með komu mjaldranna tveggja Litlu-Hvít og Litlu-Grá til landsins.
Þrátt fyrir að ferðalagið muni reynast þeim strembið eru aðstandendur verkefnisins bjartsýnir um að mjaldrarnir komist til Vestmannaeyja heilir á húfi.