Einn var fluttur með þyrlu Landhelgisgæslunnar til Reykjavíkur eftir umferðarslys sem átti sér stað rétt utan við Blönduós klukkan rúmlega 11 í morgun.
Sex til viðbótar voru um borð í tveimur bílum sem skullu saman í grennd við bæinn Húnsstaði og voru þeir fluttir til aðhlynningar á sjúkradeild HSN á Blönduósi. Ekki þurfti að loka þjóðveginum vegna slyssins.
Samkvæmt upplýsingum frá lögreglunni á Norðurlandi vestra er ekki talið að sá farþegi sem fluttur var með þyrlunni til Reykjavíkur sé mjög alvarlega slasaður, en vissara þótti þó að hafa fyrirvara á og flytja hann suður.