Mikið þrumuveður hefur gengið yfir landið austanvert í nótt, og telja eldingar líklega einhver hundruð. Þetta kemur fram í hugleiðingum veðurfræðings á Veðurstofu Íslands. Enn mælast eldingar suður af landinu og fyrir norðan Vatnajökul.
Ekki er hægt að útiloka að einhverjar eldingar nái niður í Eyjafjörð með morgninum, að því er fram kemur á vef Veðurstofunnar.
Á vef almannavarna er að finna upplýsingar um forvarnir og viðbrögð vegna eldinga.
Þar segir að forðast eigi vatn, hæðir í landslagi og berangur, málmhluti, lítil skýli og stór tré. „Leitið skjóls, ef unnt er, í stærri byggingum eða yfirbyggðu ökutæki úr málmi. Hafið glugga lokaða.“
Leiki grunur á að eldingu slái niður nálægt fólki og það nái ekki að komast í skjól er því ráðlagt að krjúpa niður á kné, beygja sig fram og styðja höndum á hnén, en leggjast ekki flatt.