Innlent | mbl | 26.8.2019 | 11:08 | Uppfært 12:35

Hvalur í fjörunni við Eiðistorg

Björgunarsveitarmenn í blautbúningum reyna að koma hvalinum út úr fjörunni. mbl.is/Hallur Már

Verið er að reyna að koma hval á haf út sem er í fjörunni á móts við Eiðistorg. Að sögn Davíðs Más Bjarnasonar upplýsingafulltrúa hjá Landsbjörg barst tilkynning um hvalinn rétt fyrir ellefu í morgun og hefur ein björgunarsveit í Reykjavík verið kölluð út.

Hvalurinn er í fjörunni í Káravík.

Hvalurinn er nokkuð vankaður að sjá að sögn myndatökumanns mbl.is á vettvangi. mbl.is/Kristinn Magnússon

Steinunn Árnadóttir, garðyrkjustjóri Seltjarnarnesbæjar, segir í samtali við mbl.is. að um sé að ræða ungan grindhval sem sé um 3 metrar að lengd. „Hann er búinn að vera lómandi hér fyrir utan Grandann frá því fyrir klukkan átta í morgun. Svo smám saman hefur hann verið að færast hingað nær og nú er hann kominn hér í fjöruna við Grandann,“ segir hún. Hvalurinn syndi stöðugt í hringi og því sé ekki eins og hann sé fastur, en hann syndi þó alltaf aftur að landi.

Fjöldi manns hefur safnast saman til að fylgjast með björgunaraðgerðunum. mbl.is/Kristinn Magnússon

„Hann er að einhverju leyti lemstraður,“ segir Steinunn og kveður lögreglu og nokkurn hóp áhorfenda verið kominn á staðinn.

Björgunarsveit sé svo á leiðinni og til standi að björgunarsveitarmenn fari í blautgalla og reyni að koma hvalnum út aftur.

Fréttin hefur verið uppfærð.

Hvalurin syndir í hringi og leitar stöðugt aftur upp í fjöruna við Eiðsgranda. mbl.is/Hallur Már

Uppfært 12:15. Sex björgunarsveitarmenn í flotgöllum vinna nú að því að reyna að koma hvalnum út, en að sögn myndatökumanns mbl.is á vettvangi virðist nokkuð vera af hvalnum dregið