Enginn Íslendingur hefur haft samband við borgaraþjónustu utanríkisráðuneytisins vegna fellibylsins Faxai sem gengur yfir Tókýó í dag. Þarlend yfirvöld hafa sent frá sér viðvörun vegna hættu á miklum öldugangi, aurskriðum og flóðum og unnið hefur verið að rýmingu svæða í dag, en mikið hvassviðri og úrkoma fylgja fellibylnum. Vindhraði í námunda við Faxai mælist um 60 metrar á sekúndu.
Naoji Nakamura, talsmaður japönsku veðurstofunnar, sagði við fréttamenn að fellibylurinn gæti slegið eldri vind- og úrkomumet.
„Enginn hefur beðið um aðstoð borgaraþjónustunnar vegna þessa máls. Við biðjum fólk að fara að fyrirmælum stjórnvalda á staðnum,“ segir María Mjöll Jónsdóttir, deildarstjóri upplýsingadeildar utanríkisráðuneytisins.
„Hvað fjölda Íslendinga varðar, þá fylgjumst við ekki með ferðalögum, en samkvæmt skýrslu ráðherra sem byggist á tölum úr þjóðskrá og upplýsingum frá LÍN eru 46 Íslendingar skráðir í Japan,“ segir hún. „Ef fólk þarf á aðstoð að halda, þá er neyðarsími borgaraþjónustunnar opinn allan sólarhringinn,“ segir María Mjöll, en númerið er +354 - 545-0-112.