Ólafur Ragnar Grímsson, fyrrverandi forseti Íslands, var á meðal gesta í móttöku sem haldin var til heiðurs forseta Indlands, Shri Ram Nath Kovind, og Savitu Kovind forsetafrú, sem komu til landsins í dag.
Móttakan fór fram síðdegis á Hilton Reykjavík Nordica og heilsuðu forsetahjónin meðal annars upp á Indverja sem búsettir eru hér á landi. Þá steig Geir Ólafsson á svið og flutti nokkur lög.
Þetta er fyrsta heimsókn forsetans til norræns ríkis, en heimsókn forsetahjónanna hefst formlega á morgun með móttökuathöfn á Bessastöðum í fyrramálið. Kovind mun einnig flytja fyrirlestur í Háskóla Íslands þann dag um áherslur Indlands og Íslands á umhverfismál og er sá fyrirlestur opinn almenningi.
Síðdegis mun Indlandsforseti svo heimsækja höfuðstöðvar Marels í Garðabæ og kynna sér starfsemi fyrirtækisins, en forsetafrúin mun skoða umhverfisvæna grænmetisræktun hjá Lambhaga og fræðast um starfsemi Mjólkursamsölunnar.
Að kvöldi þriðjudagsins verður forsetahjónunum svo boðið til hátíðarkvöldverðar í boði forseta og forsetafrúar á Bessastöðum.
Á miðvikudegi munu forsetahjón Indlands skoða þjóðgarðinn á Þingvöllum og sitja svo hádegisverð í boði Katrínar Jakobsdóttur forsætisráðherra en halda af landi brott að því loknu.