Ríkið „tilbúið að semja um sanngjarnar bætur“

Sex­menn­ing­arn­ir sem voru sak­felld­ir. Efri röð f.v.: Sæv­ar Ciesi­elski, Erla …
Sex­menn­ing­arn­ir sem voru sak­felld­ir. Efri röð f.v.: Sæv­ar Ciesi­elski, Erla Bolla­dótt­ir og Kristján Viðar Viðars­son. Neðri röð f.v.: Tryggvi Leifs­son, Al­bert Kla­hn Skafta­son og Guðjón Skarp­héðins­son. mbl.is

Lögð hefur verið áhersla af hálfu stjórnvalda að „ríkið væri tilbúið að semja um sanngjarnar bætur til þeirra sem sem sýknaðir voru og aðstandenda þeirra sem fallnir eru frá og afla til þess viðeigandi lagaheimildar.“ Þetta kemur fram í tilkynningu frá forsætisráðuneytinu í dag í kjölfar fréttaumfjöllunar um að ríkið hefði hafnað bótakröfum Guðjóns Skarphéðinssonar, eins þeirra sem sakfelldir voru og síðar sýknaðir í Guðmundar- og Geirfinnsmáli.

Segir þar að ríkisstjórnin stefni að sáttum í kjölfar sýknudóms Hæstaréttar. Settur ríkislögmaður hafi átt í viðræðum og leitað sátta við aðila málsins. Þá hefur ríkisstjórnin verið reiðubúin að undirbyggja slíka sátt með því að beita sér fyrir sérstakri lagasetningu.

Stjórnvöld skipuðu nefnd til að leita sátta eftir sýknudóminn, en henni var stýrt af Kristrúnu Heimisdóttur. Auk hennar voru í nefndinni fulltrúar dómsmálaráðuneytis og fjármála- og efnahagsráðuneytis og þá var Andri Árnason settur sem ríkislögmaður til að fara með meðferð bótakrafna í málinu. Nefndin skilaði af sér í júní, en þá kom fram að sáttaumleitanir hefðu ekki borið árangur, „að minnsta kosti væru ekki horfur á að hægt væri að ná sátt við alla aðila málsins“.

Segja stjórnvöld málið nú fyrst og fremst í höndum setts ríkislögmanns og hann sé nú að undirbúa greinargerð í máli Guðjóns Skarphéðinssonar. Þá segir í tilkynningunni að mál Erlu Bolladóttur og erindi annarra, sem tengjast málinu, séu samhliða til skoðunar hjá settum ríkislögmanni.

mbl.is

Bloggað um fréttina

Fleira áhugavert
Fleira áhugavert