Björgunarsveitin Súlur á Akureyri var kölluð út klukkan hálfníu í gærkvöldi eftir að göngufólk hafði villst á leiðinni niður úr fjallinu Súlum. Þoka var mikil á svæðinu sem og rigning sem olli því að fólkið villtist.
Þetta staðfestir varðstjóri lögreglunnar á Norðurlandi eystra í samtali við mbl.is.
„Þau voru þrjú á ferðinni, orðin hrakin, köld og blaut,“ segir hann. Þremenningarnir, sem voru íslenskir, höfðu verið að ganga á Súlur sunnan við Hlíðarfjall þegar þeir áttaðu sig á því að þeir væru villtir og óskuðu því eftir aðstoð.
Símasamband var gott allan tímann og gekk því greiðlega fyrir björgunarsveitarfólk að finna þá. Í kjölfarið var gengið með þeim að bílum þeirra. Aðgerðin gekk vel að sögn lögreglu og þremenningunum varð ekki meint af.
RÚV greindi fyrst frá.