Katrín Jak­obs­dótt­ir for­sæt­is­ráðherra gerði um­hverf­is­mál á norður­slóðum og mikilvægi þess að hlusta á unga fólkið að um­tals­efni sínu í ræðu sem hún flutti í morg­un á opnunarviðburði ráðstefn­unnar Arctic Circle í Hörpu. 

Katrín hefur ávallt lagt áherslu á í máli sínu um norðurslóðir að svæðið yrði herlaust í framtíðinni og á því var engin breyting í dag. Hún sagði Ísland ávallt hafa lagt áherslu á frið og samvinnu ríkja á norðurslóðum. „Það er sameiginleg ábyrgð okkar að stuðla að friði og stöðugleika á norðurslóðum og koma í veg fyrir landfræðistjórnmálaleg átök,“ sagði Katrín meðal annars. 

Ekki nóg að minnka kjötneyslu og hjóla

Katrín sagði grænar lausnir vera á meðal þess sem leggja ætti áherslu á þegar kemur að málefnum norðurslóða. Þá vísaði hún í nýlega skýrslu IPCC sem gefur til kynna að loftslagsbreytingar eru að eiga sér stað hraðar en svartsýnustu spár gerðu ráð fyrir. „Skýrslan undirstrikar þær áskoranir sem við stöndum frammi fyrir á norðurslóðum,“ sagði Katrín.  

Þá benti hún á nýjar tölur sem sýna að 100 stórfyrirtæki bera ábyrgð á losun 70% gróðurhúsalofttegunda frá því á 7. áratug síðustu aldar. Hún sagði stærstu fyrirtæki heims verða að axla ábyrgð. „Á meðan einstaklingar minnka kjötneyslu, ferðast um á hjóli eða keyra rafmagnsbíl duga þeir ekki einir og sér,” sagði Katrín og ítrekaði að stórfyrirtæki þurfi að grípa til róttækra aðgerða. 

Dirfist ekki að mótmæla Gretu Thunberg

Katrín tók í sama streng og Ólafur Ragnar hvað varðar áhrif ungs fólks um málefni norðurslóða og umhverfismála almennt. 

Frétt af mbl.is

Framtíð norðurslóða ekki ákveðin án opins samtals

„Ungmenni um heim allan hafa mótmælt svo mánuðum skiptir. Mótmæli þeirra byggja á fyrirliggjandi vísindum og ætti að vera okkur öllum hvatning. Við ættum að hlusta af athygli á unga fólkið sem skrópar í skólann til að mótmæla fyrir loftslagið og safnast saman fyrir utan þinghúsin viku eftir viku. Þau krefja stjórnmálamenn um aðgerðir og stjórnmálamenn verða að vera meðvitaðir um að lausnir á loftslagsvánni eru til staðar,” sagði Katrín. 

Antti Rinne, forsætisráðherra Finnlands, og Katrín Jakobsdóttir forsætisráðherra ræddu meðal annars mótmæli ungs fólks gegn loftslagsbreytingum í pallborðsumræðum á opnun Arctic Circle ráðstefnunnar í Hörpu í dag. mbl.is/Eggert Jóhannesson

Antti Rinne, forsætisráðherra Finnlands, kom einnig inn á mikilvægi þess að hlusta á unga fólkið í sínu ávarpi. Hann vísaði í orð Gretu Thunberg í New York í síðasta mánuði þar sem hún spurði hvernig stjórnmálamenn dirfðust að ræna hana og önnur ungmenni draumum þeirra og æsku. Rinne sagðist alls ekki dirfast þess og lagði áherslu á mikilvægi þess að stjórnvöld um allan heim grípi til aðgerða. 

Frétt af mbl.is

Heimurinn „í djúpri loftslagsholu“

Katrín lauk ávarpi sínu á að undirstrika mikilvægi þess að halda í vonina.

„Ég veit að hér eru allir vongóðir og er umhugað um framtíð norðurslóða. Við ættum öll að setja stjórnmálaskoðanir og ágreining til hliðar og sameinast í vilja okkar til að vernda norðurslóðir. Verkefnið er risavaxið en lausnirnar eru til staðar. Það er okkar hlutverk að koma hlutunum í verk og vekja von í brjóstum jarðarbúa því von er það sem við þurfum,” sagði Katrín. 

Tengdar fréttir

Loftslagsvá

Gretu Thunberg gert að mæta fyrir dóm

• Áhrif hlýnunar mest í Asíu
• Frítt í strætó fyrir viðskiptavini Krónunnar
• „Þeir hafa ekki alveg verið að standa við sitt“
• Stórt svæði orðið eldi að bráð

» Fleiri tengdar fréttir

• Blogga um frétt