Eldur logar ákaft í bát í Stykkishólmi

Eldur kom upp í bát í slippnum í Stykkishólmi fyrr í dag. Báturinn heitir Vesturborg ÍS 320 og er hann frá Suðureyri.

Báturinn var í viðgerð hjá Skipavík hf. í Stykkishólmi og var hann inni í byggingunni er eldurinn kom upp, að sögn fréttaritara Morgunblaðsins í Stykkishólmi. 

Eldurinn er framan til í bátnum og logaði hann ákaft þegar fréttaritara Morgunblaðsins bar að garði á fimmta tímanum. Slökkvilið Stykkishólms kom fljótlega á staðinn og vinna slökkviliðsmenn nú að því að ráða niðurlögum eldsins. 

mbl.is/Gunnlaugur Árnason

Báturinn er um 12 metra langur og mikinn reyk leggur frá honum. 

Fréttin hefur verið uppfærð.

• Blogga um frétt