„Niðurstöður könnunarinnar koma ekki á óvart og þær ýta undir þær áhyggjur sem Geðhjálp hefur áður viðrað.“ Þetta kemur fram í ályktun Geðhjálpar vegna niðurstaðna úr landskönnun Embætti landslæknis á geðrækt, forvörnum og stuðning við börn og ungmenni í skólum á Íslandi.
Í henni kemur meðal annars fram að tryggja þarf mun betur en gert er í dag að nemendur á öllum skólastigum fái þann stuðning sem þeir þurfa vegna erfiðleika á sviði hegðunar, líðanar og félagsfærni.
Þetta er umfangsmesta könnunin sem hefur verið gerð hér á landi á stöðu geðræktar í íslenskum skólum. Geðhjálp fagnar þessari könnun og með henni er hægt að kortleggja stöðuna svo unnt sé að horfast í augu við stöðuna og grípa til aðgerða.
Geðhjálp bendir á að þessi mótunarár „séu gríðarlega mikilvæg þegar kemur að andlegri heilsu síðar á ævinni. Fordómar verða ekki til upp úr engu og jaðarsetning einstaklinga vegna geðrænna vandamála hefst því miður gjarnan á þessum árum barnsins í skólakerfinu.“ Þetta kemur fram í ályktuninni.
Landssamtökin Geðhjálp skora á stjórnvöld og samfélagið að taka mark á könnuninni. „Það þarf nýja nálgun þar sem hagsmunir kerfisins eru settir til hliðar og hagsmunir barna eru settir í öndvegi. Með því að setja geðrækt, forvarnir og stuðning við börn og ungmenni í forgang á Íslandi erum við að byggja í haginn til framtíðar.“